මෙරට මිනිස්සු ගැන රනිල්ට ආදරයක් නෑ ඔහුගේ ඒ හැඟීම් හිරිවැටිලා ජනපති අද පැවැත්වූ කතාව මෙන්න

0
327

එක්සත් ජාතික පක්ෂ නායක රනිල් වික්‍රමසිංහ මහතා යහපාලන ආණ්ඩුව, එක්සත් ජාතික පක්ෂය, රට විනාශ කළ බවත් යම් ප්‍රමාණයකින් ජනාධිපතිවරයාද විනාශ කළ බවත් ජනාධිපති මෛත්‍රීපාල සිරිසේන මහතා පවසයි.

රනිල් වික්‍රමසිංහ මහතා අග්‍රාමත්‍යවරයා ලෙස පත්  නොකරන්නේ රනිල් වික්‍රමසිංහ මහතාගේ හා ජනාධිපතිවරයාගේ අතර ඇති  පුද්ගලික ප්‍රශ්නයක් නිසා නොවන බවත්  එලෙස සිදුකරනු ලබන්නේ රනිල් වික්‍රමසිංහ මහතාගේ දේශපාලන ක්‍රමය, දර්ශනය රටට නොගැලපෙන නිසා වෙන් බව ජනාධිපතිවරයා පැවසී ය.

“රනිල් වික්‍රමසිංහ මහතා යහපාලන දේශපාලන සංස්කෘතිය අමු අමුවේ දූෂණය කළා මෙන් රට  විනාශ කළා. රනිල් වික්‍රමසිංහ මහතා එක්සත් ජාතික පක්ෂයත් විනාශ කළා. ඔහු යම් ප්‍රමාණයකට මාවත් විනාශ කළා. ඒ සියල්ලමට දීමට තිබූ එකම විසඳුම රනිල් වික්‍රමසිංහ අගමැති පුටුවෙන් පන්නා දැමීමයි කියන එක මම තීරණය කළා. අපි අපට ගැලපෙන දේශපාලන ගමනක් යා යුතු වෙනවා.

ඔහුගේ දූෂිත බව මම පසුගිය කාලයේදී කිව්වා. ඔහු ගෙනා බොහෝ පනත් මා ප්‍රතික්ෂේප කළා. රට විනාශ කිරීම මගේ ශක්තියෙන් පාලනය කළා. ඔහු දරදඩු මිනිසෙක් ලෙස ලිබර්වාදී දේශපාලන දර්ශනය රට විනාශ කිරීමේ ක්‍රමයක් ලෙස භාවිත කළා. උතුරේ ජනතාව රැවට්ටුවා. උතුරේ ජනතාව වෙනුවෙන් දිය යුතු දේ ඔහු හිතාමතාම අතපසු කළා. මේ ගත්තාවූ දේශපාලන තීන්දුව ඊයේ දවස වගේම අද දවස වගේම හෙට දවසටත් නිවැරදියි. පසුගිය දිනවල පාර්ලිමේන්තුව තුළ සිදුවූ සිදුවීම් මා ගත් තීන්දු තීරණ රනිල් වික්‍රමසිංහ මහතා ඉවත් කිරීමත් මහින්ද රාජපක්ෂ මහතා පත්කිරීමත් රට ගැන හිතන ජනතාව ගැන හිතන මානව වාදි ප්‍රබුද්ධයින්ගේ ගමන් මගක් ශක්තිමත් කරන්නටත් මම පියවර රාශියක් ගත්තා.“ යැයි ද ජනාධිපතිවරයා පෙන්වා දුන්නේය.

රටේ ඇති දේශපාලන අර්බුදය හා නොසන්සුන්තාවය ඉදිරි සතිය තුළ සම්පූර්ණයෙන් අවසන් කරන බවත් එම අර්බුදය ඇති කලේ තමන් නොව රනිල් වික‍්‍රමසිංහ මහතා බවත් ජනාධිපතිවරයා සඳහන් කළේය.

පාර්ලිමේන්තුවේ 225 දෙනාම අත්සන් කර දුන්නත් රනිල් වික‍්‍රමසිංහ මහතා අගමැති නොකිරීමට තමන් තීරණය කලේ ඔහු සමඟ ඇති පෞද්ගලික ප‍්‍රශ්නයක්, පාට පිළිබඳ ප‍්‍රශ්නයක් නිසා නොව ඔහු රටට නොගැළපෙන දේශපාලනඥයෙක් නිසා යැයි ද ජනාධිපතිවරයා පැවසීය.

තමන් ජනාධිපතිවරණ පොදු අපේක්‍ෂකයා වීමට 2014 වසරේ ගත් තීරණය මෙන්ම පසුගිය ඔක්තෝබර් 26 වැනිදා ගත් තීන්දුව ද නිවැරදි දේශපාලන තීන්දුවක් ජනාධිපතිවරයා කියා සිටියේය.

මහින්ද රාජපක්‍ෂ මහතා පත්කිරීමට ගත් තීන්දුව ඊයේ දිනට, අද දිනට මෙන්ම හෙට දිනටත් නිවැරදි බව කී ජනාධිපති මෛත‍්‍රීපාල සිරිසේන මහතා එය කරනු ලැබුවේ රට බේරාගැනීමේ අරමුණින් බව ද සඳහන් කළේය.

පාර්ලිමේන්තුවේ 225 දෙනාම අත්සන් කර දුන්නත් රනිල් අගමැති කරන්නේ නැහැ. හේතුම ඔහුගේ හා මගේ පෞද්ගලික ප‍්‍රශ්නයක්, පාට පිළිබඳ ප‍්‍රශ්නයක් නිසා නොව ඔහු රටට නොගැළපෙන දේශපාලනඥයෙක් නිසායි.

ජනාධිපතිවරයා මේ බව පැවසුවේ කොළඹ සුගතදාස ක‍්‍රීඩාංගණයේදී අද (4) පැවති ශ්‍රී ලංකා නිදහස් පක්‍ෂ විශේෂ සම්මේලනය අමතමිනි.

‘තීරණය රට වෙනුවෙන්’ යන තේමාව යටතේ මෙම සම්මේලනය සංවිධානය කර තිබිණි.

ශ්‍රේෂ්ඨාධිකරණය හා අභියාචනාධිකරණය ඉදිරියේ පවරා තිබූ නඩු කිහිපයකට අතුරු තහනම් නියෝග ලැබී ඇති නමුත් තවමත් අවසන් තීන්දුවක් ලැබී නැතැයි කී ජනාධිපතිවරයා එම දේශපාලන නඩු පිළිබඳව අධිකරණය ලබාදෙන අවසන් තීන්දු තීරණ තමන් ගෞරවයෙන් භාරගන්නා බව ද මෙහිදී සඳහන් කළේය.

නමුත් ජනතාව අධිකරණය පිළිබඳව දරන මතය විවිධාකාර බව ජනාධිපතිවරයා පැවසීය.

දූෂණයට, වංචාවට, සොරකමට, පාවාදීම්වලට විරුද්ධව රට තුළ යහපත් සමාජයක් ගොඩනැගීමට තමන් එම තීන්දු දෙකම ගත් බව මෛත‍්‍රීපාල සිරිසේන මහතා කීවේය.

2015 ජනවාරි 9 වැනිදා තමන් ඉදිරියේ දිවුරුම් දුන් රනිල් වික‍්‍රමසිංහ මහතා එදා ලක්‍ෂ 62කට වැඩි ඡන්දයෙන් බිහිකළ පවිත‍්‍ර, යහපාලන දේශපාලන සංකල්පය අමු අමුවේ දූෂණය කළ බවත් එය වසර තුන හමාරක් තිස්සේ ඉවසමින් තමන් ආ ගමන ලේසි පහසු නොවන එකක් බව ද ජනාධිපතිවරයා පැවසීය.

ඔහු ඉවත් කර මහින්ද රාජපක්‍ෂ මහතා අගමැතිධූරයට පත්කිරීම හදිසි තීන්දුවක් නොව වසර තුන හමාරක් දුෂ්කර ගිරි දුර්ගයක ගමන් ගනිමින් ගත් තීන්දුවක් බව ද ජනාධිපතිවරයා සඳහන් කළේය.

රනිල් වික‍්‍රමසිංහ මහතා යහපාලන ආණ්ඩුව, රට, එක්සත් ජාතික පක්‍ෂය මෙන්ම තමාව ද විනාශ කළ බව කී ජනාධිපතිවරයා ඒ සියල්ලට දිය හැකි පිළිතුර වූයේ ඔහු අගමැති පුටුවෙන් පන්නා දැමීම බව ද කීවේය.

එක්සත් ජාතික පක්‍ෂ නායක රනිල් වික‍්‍රමසිංහ මහතාගේ අන්ත දක්‍ෂිණාංශික ලිබරල්වාදී වැඩපිළිවෙලෙහි කුණුගොඩක් බවට රට පත්නොවිය යුතු බව ද ජනාධිපතිවරයා ප‍්‍රකාශ කළේය.

පක්‍ෂය ගොඩනැගුණේ එස්.ඩබ්ලිව්.ආර්.ඞී බණ්ඩාරනායක මහතාගේ, සිරිමාවෝ බණ්ඩාරනායක මහත්මිය ඇතුළු නායකයින්ගේ මෙන්ම පක්‍ෂය සමඟ සිටි කම්කරු හා වෘත්තීය සමිති නායකයින්ගේ ලෙයින් හා කඳුළින් බව ද ජනාධිපතිවරයා කියා සිටියේය.

ශ්‍රී ලංකා නිදහස් පක්‍ෂ මහලේකම් මහාචාර්ය රෝහණ ලක්‍ෂ්මන් පියදාස, එක්සත් ජනතා නිදහස් සන්ධානයේ මහ ලේකම් මහින්ද අමරවීර, පක්‍ෂ ජාතික සංවිධායක දුමින්ද දිසානායක, පක්‍ෂ ජ්‍යෙෂ්ඨ උප සභාපති නිමල් සිරිපාල ද සිල්වා යන මහත්වරුන් ඇතුළු පිරිසක් මෙහිදී අදහස් දැක්වූහ.

LEAVE A REPLY

Please enter your comment!
Please enter your name here